خليه فى سرك(قصه جريئه)

مدينة الانتاج الاعلامي بالقاهرة

نرى حركة في المدينة وسيارات وطائرات تتحرك هنا وهناك واعداد كبيرة من الناس يتحركون في كل تجاه

قطع

نهار داخلي

استوديو من استوديوهات المدينة

نرى المذيع الشهير عمر الديب والمذيعة نهى الشاولي والمذيع معتد الدبرداش والمذيعة نميس الحريري يستعدون للظهور على الهواء مباشرة

صوت المخرج : 5 4 3 2 1 هوا

يتحرك الكرين ليستعرض الجالسين ثم قطع على المذيع عمر الديب

عمر الديب : سيداتي انساتي سادتي مساء الخير حلقتنا الليلة غير تقليدية في مناسية غير تقليدية

نهى الشاولي :الحقيقة انا كان معاد برنامجي بالليل زي مانتو عارفين .. بس لظروف خاصة هنطلع دلوقتى ومعايا اكتر من زميل وزميلة وهتعرفوا السبب

نميس الحريري : مش عايزين نحرقلكم المفاجاة بس اكيد هي مفاجاة سعيدة

علينا كلنا

معتد الدبرداش: خليكوا معانا اوعوا تروحوا في اي حته

قطع

ويظهر فاصل على الشاشة لقطات من احداث 25 يناير ولقطات للشرطة والجيش ولقطات من خطابات مبارك وصولا لخطاب التنحى لعمر سليمان

قطع

الاستوديو

عمر : الحقيقة زي ماكلنا عارفين ان النهاردة النطق في قضية قتل المتظاهرين والمتهم فيها الرئيس السابق حسني مبارك ووزير الداخليه الاسبق حبيب العادلي وسته من كبار معاونيه

نهى : الناس كلها حوالين التلفزيونات وعلى الفيس بوك وتويتر منتظرة الحكم على احر من الجمر

معتد : وفيه الاف من الشعب راحوا مقر المحكمة علشان يسمعوا الحكم بنفسهم

نميس : المفاجاة انهم لما راحوا عند المحكمة ملقوش حد خالص

عمر : يعني ايه مالقوش حد خالص مش فاهم معشل اصل انا غبي ممكن توضحولي

نهى تهرش بالقلم في قفاها ) يعني الناس وصلت مقر المحكمة لقتها مقفولة ومفيش صريخ ابن يومين زي مابيقولوا

معتد : ( يرفع حاجبيه بدهشة مصطنعة ) معقول ؟؟ مفيش صريخ ابن يومين ؟؟ امال فين المتهمين وطيارة المخلوع والصحفيين ورجال الشرطة وابناء مبارك واهالى الشهداء ؟؟ اتبخروا

نميس : ماهي دي المفاجاة بقى اللي بنكلم عنها ؟؟

عمر : ياجماعة حد يفهمني اخوكم حمار

نهى تضحك بخجل مصطنع وتغلق عينيها فلا نرى منهما شيئا )متقولش على نفسك كده سيب الناس تتكلم عنك

معتد : ياجماعة حد يقولنا فيه ايه .. جبتونا على ملا وشنا ليه سوا هنا ع الهوا

نميس : انا اقولكم.. سيداتي انساتي وكل شعب مصر العظيم .. ننقل لكم الان على الهواء مباشرة هذا الخطاب من القصر الجمهوري بحدائق القبة ثم نعود نكمل حوارنا



القصرالجمهوري - نرى الرئيس مبارك يقف يظبط ملابسه والكرافت يظبطه له ابنه جمال اما علاء فيجلس بعيدا يعبث بجواله الايفون الجديد .. حرم الرئيس تقف خلف الكاميرا بجوار المصور

حرم الرئيس : استاند باي يلا هنطلع هوا

جمال يقبل كتف والده وتحرك بعيدا عن الكاميرا ويقف بجوار والدته

مبارك ينظر للكاميرا بابتسامه عريضه

حرم الرئيس : 54321 on air

الرئيس : ايها الاخوة المواطنون .. من شعب مصر العظيم .. اتحدث اليكم بعد غياب اكثر من عام ..لاعبر لكم عن كامل تقديري وحبي واحترامي للشرفاء من ابناء هذا الوطن .. والذي ظهرت معادنهم الاصيلة طوال الفترة الماضية .. ايها الاخوة المواطنون .. لا يخفى عليكم مامرت به البلاد طوال السنوات الماضية من كوارث ومشكلات المت بنا جميعا واحزنتنا . واصابت الوطن حكومة وشعبا باكتئاب شديد.. فشلت معه كل الافلام والمسرحيات الكوميدية والرسوم الكاريكاتورية والنكات ان ترد لهذا الشعب ضحكته وخفة روحه .. التى طالما تميز بها عن سائر شعوب العالم .. لذا من موقعي كرئيس للجمهورية رايت ان اجد حلا عاجلا لهذا الوضع المؤسف.. وبعد اجتماع مع الحكومة مطول .. ودراسة شديدة التخصص والجدية .. لم نجد لهذا لوضع سوا مخرج واحد .. وهو ان يجد هذا الشعب شيئا جديدا يبعث فيه الامل والابتسامه من جديد .. ولم نتفق على ماهيه هذا الشيء . الى ان حدثت مشكلة الدولة الصديقة تونس مع رئيسها الفاسد زين العابدين بن علي ..الذي استبد بشعبه فتم خلعه من حكم البلاد وهروبه خارجها .. في هذا الوقت وصلت الينا معلومات شديدة الاهمية والحساسية من جهاز امن الدولة والمخابرات الحربية والعامة انهم قد سجلوا بالصوت والصورة ومما لا يقبل الشك او التزييف انهم رأوا في عدد من محافظات مصر المختلفة اناس يضحكون ويفرحون وهم يشاهدون هذه الاخبار عن العزيزة تونس ..وهنا جاء الحل . لمع في ذهني كالبرق الخاطف .. طالما انا هذا هو الامر الوحيد الذي رسم الابتسامة على شفاه ابناء الشعب ..فلماذا لا ننقل اليهم التجربة كاملة ليستمتع بها الشعب باكمله .. وتفتق الى ذهن وزير الاعلام فكرة رائعة عرضها علينا ووافقت عليها الحكومة بالاجماع بما فيهم الاخوين جمال وعلاء وسيدة مصر الاولى .. والفكرة هي ( الكاميرا الخفية ) .. نعم ايها الاخوة والاخوات اصدرت يومها قرارا رئاسيا بعمل برنامج الكاميرا الخفية على الشعب باكمله ويشترك فيه اكبر عدد ممكن من الكومبارس قد وصل الى ملايين الممثلين وباجور خياليه لم يقبضوها من قبل ( الرئيس ينظر الى احد الواقفين ويقول وهو يضحك : واهو بالمره حلينا مشكلة البطالة.) وكان الانتاج امريكي مصري مشترك وهو اكبر انتاج فني في تاريخ السينما والتلفزيون وباخراج مصري امريكي اسرائيلي مشترك

وكانت النقطة الاصعب اخواني واخواتي هي متى نبدا البرنامج ؟؟ وهل يكون مسجلا ثم نقوم بعرضه بعد المونتاج ؟؟ ام يكون مباشرا ؟؟ فاتفقت الاراء على ان يكون مباشراً لزيادة الخدعة على المشاهدين ؟؟ لمزيد من المتعة والابتسامة ؟؟وتبقى وقت البدء في العمل .. فجائتنا المعلومات عن نية بعض النشطاء عمل وقفة احتاجية يوم 25 يناير ..كما تعودوا دائما ان يقوموا بوقفاتهم الاحتجاجية بحماية من اجهزة الدولة جميعا لتؤمن مسيرة الحرية والديمقراطية .. فاقترح الابن جمال ان يكون بداية البرنامج يوم 25 يناير لكي تنطلى الخدعة على المشاهدين ( الرئيس يلقى تعليقا اخر : اتاريه عنده ميول فنيه وانا معرفش ( ضحك ) )

وفعلا تم الاتفاق على كل الامور المتعلقة بالبرنامج وجاء الينا يوم الفرح يوم 25 يناير ليحمل السرور والبهجة الى الشعب المصري العظيم فخرجت المظاهرات قليلة العدد للوقفات الاحتجاجة ولم يبلغ عددهم المئات على طول مصر وعرضها .. فقام المخرج ومدير الانتاج بارسال الاف الممثلين ينضموا الى هذه الوقفات لتصبح مظاهرات عارمة بعد ان امدوهم بكاميرات حديثة ليقوموا بتصوير كل تفاصيل البرنامج لا ستخدامها ف الميكنج اوف ( ايه الميكنج اوف دي ياجمال ؟؟ ها ؟؟ اه البتاع اللي بيطلع اخر الفيلم ده يطلع الغلطات ..والله انت عليك حاجات ..يلا خلي الشعب يفرح )

وهكذا نزل الاف من المصريين الى الشارع للمرة الاولى منذ عشرات السنين وهم سعداء فرحين يوزعون الورود على رجال الشرطة الشرفاء الذين يقومون بحمايتهم من السيارات المارة هنا وهناك ..وكنت اصدرت امرا صارما بحماية الشعب من النشالين الذين يندسون في الزحام لسرقة المواطنين فكان رجال الشرطة على قدر المسئولية ولم تسجل طوال الايام التاليه اي حالة نشل واحدة .

وفي نهاية يوم 25 والشعب يلتف حول قنواته الفضائية فرحا وسعيدا تنتابه حاله من البهجة غير عادية .. بدء البرناج بفقرة اخرى مثيرة وهي الاحتكاك بين المواطنين والشرطة وكان المشهد رائعا حيث انه انطلى على خبراء صناعة الاكشن في العالم ليثبت قدرة الفنان المصري على الابداع .. فالكومبارس في دور الشعب وممثلون اخرون في دور رجال الشرطة يصنعون مشاهد متميزة للكر والفر والضرب نافست افلام هوليوود وبليوود مجتمعين ..لتثبت عبقرية المصري في كل المجالات .. وهكذا سار البرنامج كما رايتم وكما كان مخطط له حتى هذه اللحظة التى نعلن لكم فيها حقيقة ماحدث وحقيقة برنامج الحكومة لاسعادكم ..لاعود اليكم اليوم كمرشح للحزب الوطني في الانتخابات الرئاسية التى مقررا ان تقام في هذه الايام .. دمتم بخير والسلام عليكم ورحمه الله وبركاته



لقطات عامة لمظاهرات حاشدة بميدان العباسية وميدان مصطفى محمود تتعدى المئات من المصريين تحمل لافتات حب وتأييد لمبارك وصورا له ويرقصون فرحا.. يقابلها لقطات لقة مندسة في ميدان التحرير وميدان الاربعين بالسويس وميادين اخرى كثيرة لا تتعدى اعداداهم بضعه ملايين تصاحبها اغنية عمرو دياب ( اللي ضحى لجل بلده لجل مايعود النهار )


الاستوديو

عمر : ( بحماس شديد ) مفاجاة من العيار التقيل تهز العالم

نهى : بس مفاجاة سعيدة طبعا

معتد : هو فيه اسعد من كده احنا بنشكر سيادة الرئيس على البرنامج ده واللي اتحمله خلال السنة اللي فاتت لاسعاد هذا الشعب

نميس : بس فيه حاجات اكيد الناس مش فاهمها وضروري تعرفها

عمر : اكيد فيه اساله كتير وعلشان كده انضملنا دلوقتى سيادة الوزير صفوت الشريف علشان يعلن لنا خفايا وكواليس الكامير الخفية

نهى : اهلا بيك سيادة الوزير وحمدا لله ع السلامه

صفوت قمة في الاناقة وابتسامة عريضة من الكتف للكتف ) اهلا بيكم .. بس حمد الله ع السلامة منين

معتد : هو مش حضرتك كنت في سجن طره الفترة اللي فاتت ..لامؤاخذه يعني قصدي بورتو طره

صفوت يضحك بصوت عالى ) طرة ؟؟!!! لا طبعا

نميس : امال الفيديوهات والصور والحاجات دي كانت ايه اللي كانت بتتنشر ليكم

عمر : ازاي ياسيادة الوزير ياريت توضحلي احسن انا فهمي على قدي



صفوت : وانا موجود معاكم النهاردة علشان اوضحلكم ..الحقيقة لما سيادة الرئيس اصدر قراره بتنفيذ برنامج الكاميرا الخفية انا بعت جبت اكبر خبراء في فن المكياج والتنكر من هوليوود بالاضافة طبعا لحبيبنا محمد عشوب علشان يعملوا مكياج للدوبليرات التي هتقوم بادوارنا

نهى : ( ترفع حاجبيها بدهشة ) دوبليرات ؟؟ نفهم من كده انكم مكنتوش موجودين اصلا ؟؟

صفوت : (ينظر اليها بخبث ) طبعا هو ده سؤال يانهى برضه .. احنا اخترنا من وسط الاف الكومبارسات الشخصيات قريبة الشبه من سيادة الرئيس والاستاذ جمال والاستاذ علاء ومن العادلي ومني ومن سرور وكل الناس المعروفة شكلها .. بس الحقيقة اللي تعبنا قوي كان نظيف

معتد : ليه يافندم ملقتوش في البلد ولا واحد نضيف ؟؟

صفوت : لا ملقناش حد طوله .. اضطرينا نجيب اقرب واحد له ونلبسه حاجات بكعب عالي علشان نوصل للطول المطلوب

نميس : طيب ماهو محدش كان هياخد باله من فرق الطول لو بسيط يافندم

صفوت : والمصداقية ؟؟ ازاي نقدم للشعب حاجه مغشوشه

عمر : عندك حق ياسيادة الوزير وبعدين كمل سيادتك

صفوت : كمان دخنا على مالقينا واحد مقاس عز .. بس ربنا كرمنا المهم جهزنا الكومبارس وابتدا الشغل يوم 25 يناير .. كل شيء تمام ونفذنا مشاهد الاكشن بجودة عاليه جدا زي ماشفتم وساعدنا فيها خبراء امريكين وكانت مشاهد الشرطة والمدرعات والضرب من اروع مايكون

نهى : تقصد حضرتك ان كل شيء كان تمثيل؟

صفوت : طبعا

معتد : طيب كان فيه مشهد قوي جدا قلب الدنيا يافندم بتاع المدرعة اللي بتدهس المتظاهرين

صفوت ( مبتسما بثقه ) : طبعا ده مشهد احب اشكر كل الممثلين عليه لانه كان اكثر من رائع .. وفرصة اشكر الممثلين اللي مثلوا دور المتظاهرين اللي العربية دهستهم لانهم كانوا متميزين وصادقين بس للاسف فيه كام واحد منهم مات فعلا من شده اخلاصه في التصوير وتقمصهم للشخصيات

نميس : يعني فيه ناس ماتت فعلا ؟؟

صفوت : اه للاسف بس كلها اخطاء واردة في اي عمل فني بتحصل يعني .. ودي جزء من عمل الدوبلير والكومبارس انه بيتعرض لمواقف خطره وبيسموهم المخاطرون .. بس خلي بالك بيقبضوا فلوس كتير ( ضحك جماعي )

معتد: ان كان كده .. ماشي

عمر : طيب واللي مات ده هيستفيد ايه بالفلوس

صفوت : لا اهله استفادوا ..انت مش تابعت ان اهالي الضحايا خدوا تعويضات فلوس وشقق

عمر: اه بس دول الشهداء بتوع الثورة

صفوت : ثورة ؟؟ !! ثورة ايه ؟؟ الفلوس اتصرفت للضحايا اللي ماتوا اثناء تاديه عملهم في تصوير البرنامج

نهى : طيب ومصابي الثورة ؟؟

صفوت : نفس الشيء خدوا فلوس وتعويضات

نهى : يعني بتعترف ان كان فيه ثورة

صفوت : طبعا

معتد : ازاي بتقول ببرنامج وتصوير وكاميرات وازاي بتعترف انه كان فيه ثورة . .انا مش فاهم سيادتك ؟؟

صفوت : الثورة دي كلمة السر

الجميع : ( كلمة السر )

صفوت : طبعا

عمر : معلش فهمني تاني لاني حمار شويه

صفوت : دلوقتي لما تنزل الاف من البشر تشترك في البرنامج ده .. هل كل الالاف دي يعرفوا بعض ؟؟

عمر : لا طبعا

صفوت : يبقى كان لازم نعمل كلمة سر اللي يقولها للتاني يعرفه انهم سوا من فريق عمل البرنامج

عمر : ااااه

صفوت : وكلمة السر دي كانت ثورة 25 يناير



الاستوديو

نهى الشاولي : طيب ده امر الشهداء والناس اللي ماتوا عرفناه واطمنا ان كله كان تمثيل .. الناس في ميدان التحرير لما قعدوا وطلبوا التنحي ده كان ايه رد الفعل على الموضوع ده .. نشوف اللقطات على الشاشة ونرجع نكمل حوارنا

( لقطات من ميدان التحرير تبرز اهم الصور واللقطات قبل التنحي مثل : امشي بقى عاوز اروح استحمى .. احدهم يحمل يافطة كتب عليها .. امشي دراعي وجعني.. وحشود كبيرة تملء الميدان )

نهى الشاولي: كان رد فعلكم ايه على المشاهد دي وطلبات الرحيل خاصة ان الناس قعدوا في ميدان التحرير وقالوا مش هنمشي هو يمشي

صفوت : ( متعجبا ) ميدان التحرير ؟؟ تحرير ايه ؟؟

نهى : ميدان التحرير اللي اصبح رمز الثورة او البرنامج اقصد

صفوت : ( ينفجر ضاحكا ) ههههه .. قصدك مدينةالانتاج الاعلامي

معتد : مدينة الانتاج الاعلامي ؟؟ ازاي ؟؟

صفوت : انا افهمك .. طبعا بعد مااصبح العدد كبير في الشوارع واختلط الناس العاديين البسطاء بالممثلين والكومبارس لقينا صعوبة في اننا ننفذ المشاهد الموجودة في اسكريبت البرنامج ففكرنا وقررنا اننا نلاقي حل سريع

نميس الحريري : وايه الحل سيادة الوزير؟

صفوت : عملنا ميدان التحرير في ميدان الانتاج الاعلامي بكل تفاصيله واحطناه بالكاميرات من كل مكان ودخلنا الممثلين كلهم عليه واصبحت الكاميرات بتنقل كانه فعلا ميدان التحرير

عمرالديب : حكاية غريبة قوي !! طيب والناس العادية اللي كانت بتتحمس وتنزل ميدان التحرير الحقيقي كانت بتلاقي ايه ؟؟

صفوت : كانت بتلاقي الميدان فاضي ونضيف والعربيات ماشيه وكل حاجه زي الفل

نهى : طيب والناس بتقول ايه لما تشوف العكس على شاشات الفضائيات ؟

صفوت : بصراحه عملوا شيء غير متوقع وابهر سيادة الرئيس لدرجة انه بكا من التاثر

معتد الدبرداش: عملوا ايه ؟

صفوت : ابتدو ا يتحركوا بايجابيه وعملوا شبكة مراسليين تلقائية وطبيعية وابتدوا يتصلوا بالتلفزيون المصري ويقولوا ان مفيش حاجه والبلد بخير وان كل ده كلام فاضي علشان يطمنوا الشعب المصري العظيم

نميس : فعلا احنا كلنا شوفنا المكالمات دي وقلنا عليها متفبركة من التلفزيون وخصوصا تامر من غمره

صفوت : بالظبط .. بس الحقيقة ان دول المواطنين الحقيقين اللي نزلواالميادين ولقوها فاضيه

عمر : يعني عايز تفهمني ان كل ده كان في مدينة الانتاج الاعلمي والبلد كلها ماشية طبيعية ومفيش اي حاجه ؟؟

صفوت : تحب اثبتلك ؟؟

عمر : ياريت ؟؟ علشان افهم

صفوت :ياريت تعرضولنا اللقطات اللي كان بيذيعها التلفزيون المصري على الهوا مباشرة في الوقت ده

(لقطات كورنيش النيل فارغا ولقطات لشاب وفتاة يجلسان في منتهى الهيام ..)

صفوت : بذمتك ده شكل بلد فيها ثورة ؟؟ الحياة جميلة اهي ومفيش ولا قنبلة دخان واحدة حتى ولا حتى دخان سيجارة كليوباترا مكتومة

عمر : اه ده كان شيء غريب فعلا

صفوت : لا غريب ولا حاجه هاتولي بقى اللقطات اللي كانت بتذيعها القنوات التانية الاجنبية والخاصة

( لقطات ميدان التحرير والمعارك بين الشرطة والمتظاهرين وقنابل الغاز والقناصة )

صفوت : شايف الجمال ..شغل متعوب عليه واللي يفرح ان كل الجمال ده عندنا في مدينة الانتاج الاعلامي ..وكل القنوات كانت بتنقل من هناك ودي حكاية هوضحهالكم بعدين

نهى : طيب سيادة الوزير موضوع الكنتاكي اللي طلع في اول ايام ده كان ايه ؟

صفوت : انتوا طبعا عارفين ان الكومبارس دول ناس غلابه وعلى قد حالهم وكان من ضمن الاتفاق معاهم ان وجبات الاكل علينا .. في الاول حبينا نجر رجلهم وجبناهلهم وجبات كنتاكي .. بس بعد كده العدد زاد والميزانية لا تسمح والناس ابتدت تتكلم وابتدوا يتخانقوا على الاكل فمشينهاها فول وطعمية


معتد : طيب سيادة الوزير ايه اصعب مشهد قابلكم في الوقت ده في التنفيذ

صفوت : كان فيه مشهد مش صعب بس كان مكلف بصراحة .. وعرضنا الامر على سيادة الرئيس فقال اصرفوا زي مانتواعاوزين ..عاوزين نفرح الشعب

نميس : ايه هو المشهد ده ؟

صفوت : مشهد حرق مقر الحزب الوطني واقتحام اقسام الشرطة وامن الدولة لانه كان في توقيت واحد ومحتاج دقة شديدة علشان الحرايق متتمدش من استوديو لاستوديو وانتوا عارفين المدينة مليانه ديكورات واكسسوارات والدنيا برد وفيه هوا بس الحمدلله ربنا سترها معانا وطلع المشهد على احسن مايكون

عمر: بمناسبة المشاهد احنا شفنا مخرج زي خالع يوسف وممثلين زي خالع الصاري وعمرو راكب وغيرهم في الميدان ايه الحكاية دي

صفوت : طبعا انت شفت الافلام العربي القديمة والجديدة برضه ان لما يكون فيه فيلم ممكن ناس زمايل الفنانين ابطال الفيلم ده يطلعوا مشاهد قصيرة تشجيعا لزمايله وكده كدور شرف يعني

عمر : اه شفناها كتير دي

صفوت : بالظبط هو ده اللي حصل . .هما كانوا جايين يجاملوا .. ومتنساش انا جاملنا مثلا المخرج خالع يوسف في اخر افلامه لما احتاج كمبارس وعربيات شرطة وكده في فيلم (سوبر ماركت شحاته) واديناله كومبارس وعربيات وكل حاجه

معتد : ايوة وكل حاجه سلف ودين

نميس : يعني كل دول كانوا هنا في مدينة الانتاج ؟؟

صفوت : طبعا طبعا

نهى : طيب ومين قال فكرة التنحي دي ؟؟

صفوت : دي كانت من اقتراح استاذ جمال

عمر : ازاي ؟؟ معقول ؟؟

صفوت : كانت الفكرة ان الشعب يشوف حاجه غير متوقعه . وكان ابعد شيء عن خيال اي حد .. ان الشعب يطلب بتنحي سيادة الرئيس اللي كل الشعب بيعشقه ..والفكرة عجبت الكل حتى اذكر الهانم علقت وقالت كويس اهو برضه علشان نقول لو الرئيس اتنحى متخافوش جمال موجود وقدها وقدود

نهى : يعني استخدمتوا فكرة التنحي لطمئنة الشعب على مستقبله بعد عمر طويل لسيادة الرئيس

صفوت : بالظبط

معتد : طيب احنا معانا بعد اذنك سيادة الوزير مداخله تليفونيه من الاستاذ مصطفى فقرى الو

فقرى : الو ازيك يااستاذ معتد انت والناس اللي معاك .. بس انا بتكلم علشان اشكر سيادة الوزير على الشغل الجامد ده وابلغه باسم كل افراد الشعب المصري تقديرهم وامتنانهم على البرنامج المميز اللي ادا نموذج لتلفزيون الواقع بحق وحقيقي ..ونشكر سيادة الرئيس وندعيله بطوله العمر .. هو استاذ جمال اه قدها وقدود بس الخير والبركة في الريس ربنا يخليهلنا يارب .. وانا كنت متاكد ان اللي حصل ده خدعه ولا يمكن يكون حقيقة ..وانا اول واحد هيدي صوته للريس في الانتخابات

نميس : نشكرك استاذ مصطفى ونرجع لسيادة الوزير .. بعد مالناس شافت التنحي في الميدان والكلام بتاع مش هنمشي هو بيمشي ايه اللي حصل

صفوت : في الاول بس احب اشكر المسئول عن كتابة الهتافات والاشعار والاغاني لانه عمل حاجات فعلا مميزة جدا وهو وزير الثقافة ونشكر الملحن الكبير عنبر مصفطى اللي عمل الاغاني الرائعه اللي ظهرت في الوقت ده

عمر : فعلا كانت حاجت مناسبة دراميا للحدث تماما

نهى :خصوصا الاغنية العبقرية شهداء 25 يناير ماتوا في احداث يناير لان ناس كتير مكانتش تعرف ان 25 يناير في شهر يناير

صفوت : بالظبط .. اديكي قولتي احداث يناير .. مش ثورة يناير ..وده يدل ان كل شيء مترتب ومعروف

الى اللقاء في الحلقة القادمة



الحلقة السادسة

صفوت : المهم اعلنا ان الرئيس هيقول كلمه وطلع فعلا الرئيس لو تفتكروا متاخر قال اول خطاب

نهى : اه وفعلا كنا بنسال بيتاخر ليه قوي في الخطابات ؟؟

صفوت : يعني نوع من انواع السسبنس

نهى : اممم .. والله .. يعني حتى الرئيس كان بيسمع الكلام ويتاخر وكده ميقولش لا عاوز انام بدري ولا حاجه

صفوت : لا بصراحه كان متعاون قوي ومكنش بيقول لا .. المهم قال الخطاب الاول وانه هيعمل تعديلات وكده والناس رفضت وده كان مقصود علشان نزيد درجة الاثارة وبعدها الخطاب التاني والخطاب الاخير طبعا احب اقولكم مفاجاة ان الخطابات التلاته اتسجلوا في يوم واحد ورا بعض واتذاعوا كل واحد في مكانه في الجدول

معتد : اه يعني مش كل خطاب في يوم ؟؟

صفوت : لا كله يوم واحد علشان التكاليف وايجار الأستوديو والكاميرات وكده .. زي مانتوا عارفين الرئيس ميحبش المصاريف ع الفاضي

نميس : طبعا طبعا ..طيب بعد الخطاب الاخير الناس رفضت ورفعت الجزم في وش الشاشات اللي كانت موجودة في التحرير .. معلش انا اسفة ازاي عدا مشهد زي ده عليكم ان الجزم تترفع في وش الرئيس

صفون : هههه . .اولا الجزم اترفعت في وش الشااشات بتاعه العرض .. صح ولا لا ؟؟

معتد : صح طبعا

صفوت : ثانيا ده كان اسقاط لحكاية الرئيس بوش وجزمة الزايدي وكده .. يعني المخرج بيقول لامريكا انتي رئيسك اضرب بيها على الهوا في وشه فاكره ياامريكا ولا لا ؟؟احنا كان ممكن نعمل كده معاكم لما اوباما جه مصر بس احنا شعب مؤدب

نهى : ماشاء الله يعني مهتمين بكل تفصيلة صغيرة وكبيرة في العمل

صفوت : طبعا طبعا

نميس : طيب وليه طلع السيد عمر سليمان يقول خطاب التنحي ومقالوش الرئيس؟؟

صفوت : لاننا خفنا ان حد من الخلايا النائمة يستغل الامر ان الرئيس بنفسه قال انه اتنحى وياخد الموضوع بجد ؟؟ علشان كده قلنا نقولها على لسان حد تاني واخترنا السيد عمر سليمان لميوله الفنية وطبقة صوته الرخيمه

معتد : سيادة الوزير بالمناسبة دي ايه حكاية الراجل اللي واقف ورا عمر سليمان صحيح في الخطاب ده .. ده جنن البلد كلها

صفوت : ههههه ده كومبارس معانا في البرنامج وانا اخترته بنفسي على فكره لانه شبه حسام البدري اللي كان لسه سايب الاهلي ورايح السودان حبيت اقوله رساله ان في اي مكان هجيبك هجيبك ياحسام

عمر : وطلع الخطاب والناس فرحت وطلعت مظاهرات عارمة فرحانه بالتنحي دي اتصورت ازاي اللقطات دي

صفوت : طبعا كل ده كان في مدينة الانتاج الاعلامي واللوكيشنات كتير من كل المحافظات عملينها زي مانت عارف بالاضافة اننا استخدمنا بعض اللقطات المسجلة في ارشيف التلفزيون لما الناس نزلت تحتفل بفوز مصر بكاس الامم الافريقية اخر مرة

نهى : لقطات مسجله ؟؟

صفوت : طبعا انتوا لو خدتوا بالكم ان الاعلام كلها كتير قوي وبتوع الاتراس موجودين في اللقطات والاحتفالات باعداد كبيرة؟؟

نميس : اه مظبوط

صفوت : بذمتكم فيه التراس بيطلع مظاهرات ؟؟

عمر: تقصد ان اللقطات دي مسجله كلها ومكنش فيه التراس اثناء المظاهرات قصدي التصوير

صفوت : لا طبعا

معتد : امال الناس اللي ماتوا في بورسعيد قريب دول مش التراس الاهلي ؟؟

صفوت : غاضبا !! قلتلك مفيش حد مات ومفيش التراس ..واللي حصل في بورسعيد جزء من البرنامج

نهى : متزعلش حضرتك ممكن توضحلنا بس لان فهمنا على قدنا

صفوت : يوم المبارة بتاعه الاهلي والمصري الناس كانت ابتدت تزهق من البرنامج والاتصالات تقل على كل برامج التوك شو اونتم عارفين ده كويس علشان كده كان لازم يبقى فيه حدث قوي يجمع الناس تاني حوالين التلفزيون ومينزلوش الشوارع علشان ميعرفوش ان الحياة ماشيه طبيبعية وكل ده خدعه.. فبعتنا مجموعة من الكومبارس في اتوبيسات لابسين تي شيرتات الاهلي ودخلناهم لحد باب الاستاد ودخلوا وقعدوا .. معاهم اكلهم وشربهم والبوكيت مني بتاعهم

وسجايرهم ميت فل واربعتاشر

واتفقنا مع ريجسير في بورسعيد يوردلنا 100 واحد علشان يشتركوا في المشهد ده ويدخلوا يضربوا بتوع الاتراس الاهلي وفعلا ده اللي حصل

معتد: بس قالوا فيه ناس ماتت فعلا ؟؟

صفوت :انت شفت حد مات بعينك ؟؟

معتد : لا بس الصور والفيديوهات والدم على الكراسي

صفوت : دي اسهل حاجه الصور فوتو شوب والفيديوهات تمثيل والدم ده مكياج

عمر : يعني محدش مات ؟؟

صفوت : لا فيه كام واحد ماتوا بس ده بالغلط

عمر : ازاي

صفوت :يعني فيه مشجعين حقيقين من بتوع الاهلي لما شافوا كومبارس المصري داخل عليهم وماسكين اسلحة وسنج ومطاوي خافوا بجد طلعوا يجروا منهم على الباب البال كان مقفول بالقفل حد يسالني مقفول ليه ؟؟

نهى : مقفول ليه ؟؟

صفوت : اقولك دلوقتي الظابط شايف ناس بتجري على جمهور الاهلي علشان يضربه يحميه ازاي ؟؟؟

نهي : ازاي ؟؟

صفوت : قفل الباب بالقفل علشان محدش يدخل عليهم ويعورهم وطلع يجري .. وهو بيجري وقع منه المفتاح.. ولما جماهيرالاهلي طلعت تجري لقت الباب مقفول اتكربسوا فوق بعض ماتوا من الخضة .. وده بيحصل في كل بلاد العالم

عمر : فعلا انا اذكر يافندم ان في استاد ويمبلي في لندن مات ناس كتير قبل كده وقع المدرج بيهم

صفوت : بالظبط .. بس الحمدلله الضحايا مش كتير .. بس اضافوا حاله من الاثارة رائعه ورجع الالتفاف تاني حوالين القنوات والشاشات



الى اللقاء في الحلقة القادمة

الحلقة السابعة

نهى : طيب يافندم بخصوص القنوات الفضائية الخاصة هل كانت تعرف الحكاية دي ولا لا؟؟ واتعاملت مع الاحداث ازاي ؟؟

صفوت : لا طبعا مكنش يعرف غير اصحاب القنوات اللي كانوا بيدوا التعليمات للمخرجين والمصورين والمذيعين بناءا على الاوامر اللي بنديهالهم ..علشان نحافظ على سرية البرنامج ..

معتد : اه بس اناشفت منهم قناة كانت بتعرض مباشر شارع محمد محمود ومجلس الوزرا والتحرير زي قناة دي تي دي وقناة اوف تيتي .. ازاي ده تم ؟

صفت : طبعا دول احنا كنا بنديهم الاشارة بتاع البث من عندنا يعني كاميراتنا بتصور وتخرج ونبعتلهم الاشارة يعرضوها على اساس انهم هما اللي بيغطوا مباشر لمزيد من المصداقية

نميس: طيب يافندم قناة الحظيرة ليه وقفتوها واتعملتوا معاها ازاي؟

صفوت : طبعا كانت هتكشف الموضوع كله لما نزلوا بكاميراتهم للشوارع ولقوا الحكاية مختلفة فسحبنا ترخيصهم ووقفناهم عن العمل ..وبعدين اتواصلوا معانا وفهمناهم الحدوتة ورحبوا جدا انهم يشاركوا وقالوا المصلحة واحدة واديناهم لوكيشن هنا في مدينة الانتاج حلو قوي بيطل على بلاتوه ميدان التحرير

عمر: طيب فيه قنوات كتير قوي طلعت فجاة منعرفش مين اصحابها ولا طلعت امتى ايه حكايتها دي؟

صفوت : لا حكاية ولا حاجه كان لازم يكون فيه عناصر تشويق في البرنامج والراي والراي الاخر وناس تشتم ناس وناس تخون ناسووناس تقول يمين يقوما التانيين يقولوا شمال

عمر: وناس كلامها عجب وناس قلوبها دهب

صفوت : وناس وناس وناس .. وهي دي الديمقراطية الحقيقية اللي حبينا نمرن الشعب عليها .. فازاي كل ده هيتم على قناتين تلاته فبصراحه بعض الوزرا ورجال الاعمال واعضاء مجلس شعب اتبرعوا بمبالغ كبيرة لانشاء القنوات دي للمساهمة في سعادة الشعب المصري واحب اشكرهم جدا

نهى: واحنا كمان بنشكرهم معاك ونتمنى ان ربنا يعوض عليهم ان شاء الله

معتد: طيب احنا كدنا نقدر نفهم ان كل الشهداء اللي سقطوا كانوا كومبارس ممثلين في الفيلم ده قصدي البرنامج

صفوت : طبعا

نميس: يعني محمد محمود .. مجلس الوزرا .. بورسعيد

صفوت : كله كله

عمر: طيب يافندم حكاية انتخابات مجلس الشعب والشورى والدستور ايه نظامهم دول عملتوهم ازاي

صفوت : كل ده كان مكتوب في السيناريو احنا ان شاء الله في احتفالات 6 اكتوبر هنكرم كل الممثلين دول في استاد القاهرة بحضور الرئيس وهنعمل اوبريت اسمه الشعب والشورى ايد واحدة

نهى : يعي الانتخابات كلها تمثيل والاعضاء ممثلين ؟؟

صفون : طبعا بما فيهم القضاة ولجان الفرز وكله .. لا كلفنا مبخلناش .. والاجمل هو اهتمام بعض المواطنين لاول مرة بالانتخابات ونزلوا يصوتوا فعلا في اللجان اللي كنا عاملينها.. ودول ادوا مصداقية للبرنامج

معتد: ده انتوا كلفتوا جامد جدا كده

صفوت : كله علشان الشعب

نميس: طيب والاخوان والسلفيين والليبرالين وكل ده كان ايه؟

صفوت : طبعا كل ده كومبارس متكلم وشباب معهد السينما ومعهد فنون مسرحية وشباب من الهناجر قلنا نديهم فرصة للتمثيل واخراج مواهبهم للجمهور وبالمناسبة فيه مسابقه هنعلن عنها قريبا لاختيار افضل ناس من الشباب دي هيعمل بطوله مسلسلات رمضان ؟؟

عمر : طيب زي مين يافندم ؟

صفوت : يعني من فنون مسرحية عندنا وائل غميم اسماء محفور نائل عبدالفتاح احمر دومة يعني ناس كتير هنعلن عنهم ونفتح باب التصويت للجمهور ان شاء الله

نهى : بس موضوع الاخوان والسلف مش كان صعب؟

صفوت : لا صعب ولا حاجه كان ضرورة لانجاح فكرة البرنامج اننا نعمل أي حاجه غير تقليدية فكان خروج الجماعة المحظورة من السجون والسلفيين من الجحور هو اكتر الاشياء فانتازيا وفعلا استعنا بعناصر منهم حقيقيين بجنب الممثليين

معتد : يعني الجماعة لسه محظورة ؟؟

صفوت : امال يعني اعضاء مجلس شعب ؟؟!!


الحلقة الثامنة

نميس :طيب سيادتك محكتلناش حكاية الانفلات الامنى ازاي حصل؟؟

صفوت : ده كان من الاشياء برضو الصعبة في التنفيذ .. بس الاخراج هو اللي نجح الموضوع ده

عمر : ازاي ؟

صفوت : احنا اخرجناهم من السجون فعلا

نهى : المساجين

صوت : طبعا .. وصورنا ده بكاميرات الجوالات علشان كده الجودة مش قد كده ..بس كان مطلوب للمصداقية

وعلى بعد كام متر من كل سجن كان فيه كمين بيلمهم تاني على عربيات الترحيلات

معتد: ووديتوهم فين؟؟

صفوت : دي كانت النقطة المميزة احنا خدنا بتوع الفيوم وديناهم اسكندرية وبتوع اسكندرية وديناهم طنطا وبتوع طنطا الاسماعيلية وهكذا

نميس: فكرة عبقرية

صفوت : ماهي فكرتي

عمر : الحقيقه يعني حاجه تفرح وتقول للعالم كله قد ايه احنا متطورين في المجال الفني ونستحق الاوسكار عن البرنامج ده

صفوت : كمان شغل المؤثرات كان عالي قوي؟؟

معتد:ازاي ؟؟

صفوت : في فقرة الانفلات الامني شويه مكالمات مفبركة من ممثلين عن اقتحام البيوت واختطاف البنات مع شويه اصوات رصاص وضرب نار وصرخات .. عملو جو مفزع حقيقي

نميس : امال اللجان الشعبية اللي اتعملت بقى كانت بتعمل ايه .

صفوت : ولا حاجه الناس نزلت قعدت قدام البيوت ملقوش لا بلطجيه ولا حرامية ولا حاجه .. واحنا طلعنا اشاعات ان اللجان الشعبية في بعض المناطق مسكت بلطجية .. وكنا عارفين ان بقيت اللجان الحقيقة هتحس بالغيرة وتقول اشمعنى احنا ... بقى كل شويه يقولوا مسكنا بلطجية وسلمناهم للجيش وطبعا لا حد مسك ولا حاجه

نهى : الحقيقة فيه سؤ ال محير ..ظهر خلال العام الماضي كائن غريب اسمه عماشه على قناة خاصه اسمها المقرعين ده تبعكم ولا ايه؟؟

صفوت : عماشة ده حبيبي .. وعارفينه لما نزل في الفيديو المشهور وهو بيبوس ايدي فكان لازم نعمل معاه واجب فادينلاه شويه اوراق ومستندات مضروبة عن الماسونية والخطر الامريكي و اسرائيل وعلبتين ترامادول وسيبناه يهرتل كل يوم على فكرة دي كانت الفقرة المحببة لسيادة الرئيس

معتد : يعني هو معاكم ولا لا ؟؟

صفوت : لا هو اغبى من انه يكون معانا ..احنا كنا بنلاعبه من بعيد لبعد .. نرميه العضمه وهو يجرى وراها وبس

عمر : معانا اتصال من الاعلامي الدكتور عماشه اتفضل

عماشه : مساء الخير ياسيادة الوزير ..بقى كده برضه متقوليش ده انا حبيبك .. هوا نا سفيه ؟؟ ده انا كنت هعملك احلى فقرات وكده تسيبني اغلط في سيادة الريس واولاده المحترمين الكمل

صفوت : طول عمرك مدب ياعماشه..وبعدين احنا ساعدناك برضه

عماشه :ساعدوتني فيه ده انتم ورطوني

صفوت: امال مين كان بيصرف على الوقفات اللي في العباسية ياعموشه .. والناس اللي طلعت دي جت منين ؟؟ ماحنا اللي بعتنهملك .. متركز كده وترسه

عماشه: انا قلت الناس صدقتني وبقيت بطل شعبي وهرشح نفسي للرياسة

ضحك في الاستوديو

عمر : نشكر الدكتور عماشه

معتد : طيب موضوع مهم تاني مكلمناش فيه وهو موضوع المحاكمة ازاي سيادة الرئيس كان بيروح المحكمة ويظهر في القفص زي المجرمين وكده

صفوت : لا طبعا زي ماقلت في الاول الدوبلير هو اللي كان بيظهر في المحاكمات

نهى : طيب ليه كان بيظهر نايم على سرير طالما انه مش الرئيس ؟

صفوت : الموضوع ده ليه حكايه عجيبة .. لما جبنا الدوبلير ده وعملناله المكياج الحقيقي الولد بقى صورة طبق الاصل من سيادة الرئيس .. ودي كانت المشكلة

عمر : ازاي ؟

صفوت : لانه اول ماكان يبص في المراية او حد يكلمه على انه الرئيس ركبه تخبط في بعض .. طبعا رئاسه مصر مش شيء هين ..مسئولية كبيرة تتهزلها اتخن ركب .. المهم حاولنا معاه كتير مفيش فايدة وكان ضروري يظهر علشان المحكمة واللعبة تكمل .. ملقناش حل غير اننا ننيمه على السرير علشان ميخبطش ركبه ويفضحنا ..بس للاسف برضه فضحنا

معتد: فضحكم ازاي؟

صفوت : بدات المحاكمة ياسيدي وكانت بتتنقل على الهوا والناس مبسوطه وزي الفل ومحققين اعلى نسبه مشاهده وبنبيع كمان للقنوات الخاصة ..وييجي صاحبنا في عز الشغل يضرب صباعه في مناخيره ويعقد يلعب.. حاجه تقرف

نهى: بصراحه كانت حاجه مقززة قوي وكلنا استغربنا ان سيدة الرئيس يعمل كده قدام الكاميرات

صفوت : طبعا بعد الهوا وبخناه على الحركة دي ولكن اتضحلنا ان دي حركة لا ارادية عنده من زمان وميقدرش يتحكم فيها وبقينا في ورطة لاننا منقدرش نغيره والمحاكمات يومية وهتحتاج تدريب لشخص تاني ووقت

نميس : وعملتوا ايه يافندم في الموقف ده؟

صفوت : اضطرينا اننا نمنع الكاميرات انها تصور المحاكامت والجلسات تكون شبه سرية ونمنع النشر عن القضية ..

عمر: ااه اتارينا استغربنا من الحكاية دي..فعلا يااخي اذا عرف السبب بطل العجب


الحلقة الاخيرة

معتد : سيادة الوزير ايه حكاية موقعة الجمل دي ؟؟ وهشمعنى الجمل بالذات اللي اخترتوه ؟؟

صفوت : ده علشان تنشيط السياحة

معتد: السياحة ؟؟ ازاي ؟

صفوت : زي مالناس كلها عارفة ان السياح بتيجي من كل حته وتحب قوي تركب الجمل وتتصور بيه .. فحبينا نظهره اكتر للناس بره ونوريهم امكانياته في الجري والكر والفر .. وانه مش بس سفينة الصحراء لكن سفينة الاسفلت كمان .. فبعتنا كام واحد من نزلة السمان يعملوا شو .. عرض فنون شعبية يحكي عن تراث مصر .. وصممنا مشهد زي مشهد حفر قناة السويس بالظبط .. الناس بتضرب المصريين اللي كانوا شغالين في السخرة بالكرابيج .. علشان يحفروا القناة .. وده كان اسقاط مقصود ان المصريين هما هما عبر السنين متغيروش

نهى متوجسه خيفة ) تقصد لازم ينضربوا بالكرباج .؟

صفوت : لا انتي مخك راح فين .. اقصد بيحبوا يحفروا وزي ماحفروا القناة حفروا مترو الانفاق .. وكمان حفروا الانفاق على الحدود مع غزة

الكل مرتاحا ويلتقط انفاسه : اااااه

نميس: اخرحاجه معرفناش دور المجلس العسكري في البرنامج ده

صفوت : دور البطولة طبعا

عمر : ازاي

صفوت : لما اصدرنا فكرة التنحي طيب يعني مين يمسك البلد ؟؟؟ ملقناش غير المجلس العسكري ليييه ؟؟ لان لو قلنا فلان ؟؟ هتطلع ناس تقول لا ؟؟طيب فلان ناس تانيه تقوول لا ؟؟ لكن اما نديهم مجلس بحاله شوف بقى فيه كام واحد مش هيقدروا يتفقوا عليهم بالاضافة لفكرة انهم حموا الثورة والكلام ده وبصراحه اتحملوا كتير خصوصا في الفترة الاخيرةوبحب اشكرهم جميعا

معتد : في نهاية حلقتنا نحب نشكر سيادك على التوضيح للبرنامج الجميل ده اللي اسعد الشعب المصري كله

عمرو : واهو الناس شافت بعنيها ان لو الرئيس جراله حاجه او الداخلية وقعت والظباط اتقمصوا البلد هتبوظ ازاي ونحمد ربنا ان كل ده كان تمثيل

نهى :وبنشكر سيادة الرئيس انه بيفكر في اسعاد الملايين اللي بتحبه

نميس :وبنشكر سيادتك على الجهد الكبير ده

صفوت :وانا اشكركم انتم كمان على دوركم المميز في البرنامج ده( ينظرون لبعض باحراج ) لولاكم مكنتش الناس صدقت ان فيه ثورة خصوصا عمر الديب لما طلع وقعد يشتم الرئيس واحمد عز وجمال وعلاء مبارك وعيط ..كان مشهد اكتر من رائع ..كمان انتى يانهى لما جبتى الموسيقار الشميعي وقعدتي تعيطي انتي وهو كان مشهد مؤثر حقيقي ..ونميس ومعتد بقى اعترفوا بالثورة وبقوا يستضيفوا الناس اللى تهاجم الثورة ..شغل كان متميز وكلكم هيكرمكم سيادة الرئيس ويعطيكم اوسمة ان شاء الله

عمر: وبكده نوصل لنهاية حوارنا ونشوفكم ان شاء الله في حلقة جديدة غدا واحتفال بعنوان عودة الرئيس

قطع

لقاءات في الاستوديو حيث المذيع الامع سيس علي والمذيعة هباء السومري

سيس : طبعا احنا اول ناس قلنا ان مفيش ثورة وده كله شغل مفبرك ومؤامرة على مصر

هباء:وطلعنا الادلة على كده على قناة الدائري والناس هاجمتنا وقالوا علينا فلول

سيس :والنهاردة االايام بتثبت اننا صح وكنا صح وبحب البلد دي قوي

هباء : وكان كل مصلحتنا مصلحة مصر

سيس: ياحبيبتي يامصر



لقاءات مباشرة من الشارع حيث مليونية بنحبك ياريس من ميدان العباسية

مختصم محصور : انا من الاول عارف الحكاية دي علشان كده كنت واقف جنب سيادة الرئيس ومعايا سيديهات عليها معلومات مهمة جدا عن الناس اللي استغلت السنة دي لقلب نظام الحكم وهقدمه للنائب العام ..وبنشكر سيادة الريس المحترم اللي خلى الشعب يفرح وينبسط

الكابتن احمر شعير : انا عارف ان الريس بيحبني والاستاذ جمال وعلاء كمان .. علشان كده كنت نازل في الثوار تقطيع وبهدله لاني كنت متاكد ان فيه حاجه غلط .. البلد من غير مبارك متنفعش ..بذمتكم حد عرف يحتفل بالعيد السنة اللي فاتت ؟؟ ده احنا بنقول عيد مبارك .. مش عيد ابو الفتوح ولا ابو اسماعيل .. عيب .. عيب ده احنا شعب مخلص ومحترم .. والحمدلله الامور عادت لوضعها الطبيعي



كابتن حالق شنبي ( يدخل الميدان في زفة بلدي ) مساء الانوار عليكم .. الليلة طبعا الانوار كملت بظهور الحقيقة ونهاية برنامج الكاميرا الخفية اللي كنت عارف كل تفاصيلها لحظة بلحظة علشان محمد بيه في الداخليه كان بيبلغني اول باول بس مكنتش عاوز اعمل بلبله في الراي العام ..



الفريق اجمد شقيق : انا بالمناسبة دي بعتذر للرئيس اني رشحت نفسي .. وفرحت بعودته جدا ..ووزعت بنبوني على كل اهل المنطقة بتاعتي واسالوهم

الشيخة باتعه : انا قلت ان السيد الرئيس مباريك من الاشراف هو والسيدة حرمه والسيد جمال وعلاء .. وكنت متاكده من الحقيقة دي لاني شفت منام انهم جايين لابسيين ابيض في احمر في اسود وقاعدين يضحكوا قوي وهما مبسوطين وراكبين عربية كبيرة من بتوع الممثلين بتوع امريكا والناس كلها في الشوارع ميتة على روحها من الضحك .. ربنا ينصرك ياشريف يابن الاشراف


استوديو قناة المقرعين

عماشة : انا طبعا عاوز اقولكم حاجه انا كان عندي المستندات دي وبتاكد ان فيه لعبه بتحصل على الشعب بس مكنتش متاكد منها ومحبتش اعلن للراي العام كده الا لما تكتمل كل الاوراق في ايدي والا ايه ياحالات ياجرجيري

حالات الجرجيري تضم شفتيها كالارنب ) طبعا يادكتور احنا كلنا بنتعلمك منك وكلنا بنحب الريس وكنا بنطلع العباسية علشان نأيده

عماشه : انا طفشت كل المرشحين للرئاسة لما زنقتهم وسالت واحد منهم حزمة الجرجير فيها كام عود ولولا كده كان الناس انتخبته واختارته رئيس .. احنا معاك ياريس وربنا يديك الصحة وتنضف البلد من المستغلين والمدعين اللي لعبوا طول السنة اللي فاتت علشان يخربوا البلد


القناة الاولى والثانية والثالثة ...الخ

المحلن عنبر مصفطى : طبعا انا كنت عارف من الاول .. انت هتلاعبني في البرامج .. لا تعالى بقى في حتتي وانا اقطعك .. من اول يوم زوايا الكاميرا كانت غلط .. ولحن الاغاني في الميدان كانت مش مظبوطه .. ازاي تشتغل مودرن على كلمات كلاسيك .. قصدك تقولي من فات قديمه تاه ؟؟ حمدالله عا السلامه ياريس وبالمناسبة دي عامل اغنية بتقول: لفنا ورحنا وجينا وغيرك ماتمنينا

جربنا كل التيارات وحبك في قلوبنا عمره مامات


لقطات للانتخابات الرئاسية ..ظهور النتيجة بفوز مبارك بفرق كبير عن منافسه ايمن نور..

حكم بسجن ايمن نور

السيدة سوزان مبارك تفتتح مهرجان البراءة للجميع بقاعة المؤتمرات الكبرى بمدينة طرة .. عفوا مدينة نصر

مبارك يتنازل عن الحكم لولده جمال نظرا لحالته الصحيه

احتفالات تملء الشوارع والميادين تحمل صور جمال مبارك مفجر ثورة التغيير

اظلام بطيء